«صبري فواز يثني على والد الطفلة هايدي بعد لفتته الإنسانية ويؤكد أهمية تقبل جمال الجميع»
علّق الفنان صبري فواز على تصرف الطفلة ووالدها بعد القصة التي انتشرت مؤخرًا على منصات التواصل الاجتماعي، حيث كتب فواز عبر حسابه على فيسبوك: “هايدي بنت جميلة وطيبة ومُتربية، وعملت خير، المواقع جريت عليهم لتصويرهم وإجراء لقاءات معهم، ودي حاجة كويسة يشكروا عليها، والراجل، أبو هايدي، قال كلمة في منتهى الجمال: (أنا شايف إنها حاجة عادية)”.
وتابع فواز: “مافيش أجمل من كده رد، خصوصًا لما ييجي من راجل طيب شريف يعرف يربي، ليه عايزين نجرهم لحواراتنا وترينداتنا ونخليهم يفكروا في حاجات مالهمش علاقة بيها؟ سيبوا الناس بجمالها، دول آخر حاجة حلوة”.
وقد خطفت الطفلة الصغيرة التي لا يتجاوز عمرها الثانية عشرة عامًا قلوب الناس بتصرفها الإنساني، بعدما قررت التنازل عن رغبتها الشخصية لمساعدة رجل مسن يجلس في الشارع.
وقالت، صاحبة ترند “كيس الشيبسي”، في حديثها لموقع صدى البلد: “كنت بجيب فطار لي وأنا وماما، شوفت الراجل الغلبان وصعب عليا، وقررت أديه آخر خمسة جنيه معايا”.
وأضافت: “قبل كده شوفت ست بتتشحت وصاحب السوبر ماركت زعقلها ومشيت زعلانه، فأديتها آخر عشرة جنيه معايا”.
وتابعت: “ماما وبابا علموني لو لقيت حد بينمر على حد، أزعّقه وأساعد الناس”.
وعن انتشار الفيديو، قالت: “ماكنتش أعرف إني هتشهر، لقيت ماما بتصحيني وبتقولي اتشهرتي والناس شافت عملتي إيه”.
واختتمت حديثها قائلة: “لو معانا فلوس وحد محتاجها، نساعد الناس، ولو مش معانا نقول لهم كلمة حلوة، حتى من غير ما نضايقهم أو نزعقلهم”.